Qar örtüyünün hündürlüyü Nabranda 52 sm olub

Ekologiya və Təbii Sərvətlər Nazirliyinin Milli Hidrometeorologiya Departamenti ölkə ərazisində müşahidə olunan faktiki hava ilə bağlı məlumat yaymışdır.

Ekologiya və Təbii Sərvətlər Nazirliyinin Milli Hidrometeorologiya Departamentindən  verilən xəbərə görə yanvarın 30-dan başlayaraq və yanvarın 31-də ölkə ərazisində hava şəraiti kəskinləşmiş, intensiv qar yağmış, şaxta qeydə alınmışdır.

Qar örtüyünün hündürlüyü Nabranda 52 sm, Sarıbaşda 26 sm, Lənkəranda 23 sm, Lerikdə 21 sm, Altıağacda 19 sm, Qubada 18 sm, Qubanın dağlıq ərazilərində 15-19 sm, Göygöl və Oğuzda 17 sm, Yardımlıda 16 sm, Şəki və İsmayıllıda 12 sm, Göytəpədə 11 sm, Kəlvəz, Xaçmaz, Qəbələdə 10 sm, Göyçay, Xınalıq, Cəfərxanda 8 sm, Şamaxı və Ağdərədə 6 sm, Sabirabad, Gədəbəydə 4 sm, Ordubad, Tərtər, Zərdab, İmişli və Salyanda 3 sm, Mingəçevir, Tovuz, Zaqatala və Gəncədə 2 sm, Bakıda 16 sm, Pirallahı və Maştağada 4 sm təşkil etmişdir.

Şimal küləyi bəzi ərazilərdə güclənmiş, çovğun olmuşdur.

Havanın minimal temperaturu Abşeron yarımadasında 3-5, aran rayonlarında 2-5, dağlıq rayonlarda 5-8, Naxçıvan MR-də 0-5 dərəcə şaxta təşkil etmişdir.