Göyçay Olimpiya Kompleksində Azərbaycan güləş məktəbinin ən məşhur yetirmələrindən biri, əməkdar məşqçi, əməkdar bədən tərbiyəsi və idman xadimi Ehsan Kərimovun xatirəsinə həsr edilmiş yunan-Roma güləşi üzrə respublika turniri keçirilmişdir. Yarışın mükafatları uğrunda xalça sahibləri ilə yanaşı Lənkəran, Kürdəmir, Daşkəsən, Qubadlı, Abşeron, Sumqayıt və digər rayonların nümayəndələri mübarizə aparmışlar.
Bu barədə redaksiyamıza məlumat verən Göyçay Rayon Gənclər və İdman İdarəsinin rəisi Elşən Şirinovun bildirdiyi kimi, turnirin açılış mərasimində Göyçay Rayon İcra Hakimiyyətinin başçısı Mənsur Məmmədov, Azərbaycan Güləş Federasiyasının regionlar üzrə vitse-prezidenti Cavanşir Qurbanov, mərhum məşqçinin oğlu Atiq müəllim, fəxri bədən tərbiyəsi və idman işçisi Şahəddin Məmmədov və başqaları çıxış edərək E.Kərimovun Azərbaycan idmanında böyük xidmətlərini dərin minnətdarlıq hissi ilə xatırlamışlar.
On çəki dərəcəsində keçirilən görüşlərdə göyçaylılar İmran Novruzov (42 kq), Cavidan Şəfiyev (46 kq), Kürdəmir güləşçisi Surxay Rəhimov (54 kq), Cəlilabad təmsilçisi Azad Abbasov (58 kq), sumqayıtlı Murad Paşayev (100 kq) və başqaları daha yaxşı hazırlıq nümayiş etdirərək xatirə turnirinin qalibi olmuşlar.

Oqtay BAYRAMOV, "Xalq qəzeti"