Azərbaycan cüdoçuları Almaniyanın Düsseldorf şəhərində keçirilmiş "Qran-Pri" turnirində bir bürünc medalla kifayətlənmişlər. Komandamıza yeganə mükafatı Pekin Olimpiadasının çempionu Elnur Məmmədli (81 kq) qazandırmışdır.
Tatami ustamızın bu müvəffəqiyyəti 80 reytinq xalı ilə qiymətləndirilmişdir. Turnirdə beşinci yeri tutmuş Elxan Məmmədov (90 kq), Tərlan Kərimov (60 kq) və Kifayət Qasımova (57 kq) isə hərəyə 40 xal qazanmışlar.

Boksçularımız fəxri kürsüdə
Bolqarıstanda başa çatmış beynəlxalq tunirdə ölkəmizin iki boksçusu fəxri kürsüdə təbrikləri qəbul etmişdir. Elvin İsayev (60 kq) və Tamerlan Abdullayevə (64 kq) bürünc medallar təqdim olunmuşdur.
Qeyd edək ki, azerisport.com-un bu yarış barədə yaydığı xəbərdə həmçinin bildirilir ki, Abdullayev müvəffəqiyyətə aparan yolda erməni rəqibi Volodya Ayrapetyana da qalib gəlmişdir. Sonuncu döyüşü davam etdirməkdən imtina etmişdir.

Oqtay BAYRAMOV, "Xalq qəzeti"