UEFA-dan "Araz" üçün xüsusi reys
İslandiyada baş verən vulkan püskürməsi nəticəsində hava nəqliyyatında ortaya çıxan problemlərlə əlaqədar futzal üzrə UEFA kubokunun "Dördlər finalı"nda iştirak edəcək "Araz"ın Portuqaliyanın Lissabon şəhərinə yola düşməsində çətinliklər var. Bununla əlaqədar AFFA ilə UEFA arasında aparılan danışıqlar nəticəsində UEFA tərəfindən "Araz"ın Lissabona yola düşməsi üçün xüsusi təyyarə reysi ayrılıb və təmsilçimiz Lissabona gedib.
Qeyd edək ki, Azərbaycan çempionu "Araz" futzal klubu aprelin 25-də Lissabonda keçirilən UEFA kuboku turnirinin final mərhələsində üçüncü yer uğrunda görüşdə İtaliyanın "Luparense" komandasına qalib gələrək üçüncü yeri tutmuşdur. Oyunun əsas vaxtı 2:2 hesabı ilə başa çatmışdır. Penalti seriyasında daha dəqiq olan Azərbaycan futzalçıları 5:4 hesabı ilə qalib gəlmişlər.

Yoldaşlıq oyunlarının vaxtı müəyyənləşib
Azərbaycan milli komandasının may və iyun aylarında Avstriyada keçirəcəyi yoldaşlıq oyunlarının başlanma vaxtı və stadionlar müəyyənləşib.
Komandamız mayın 26-da Moldovanın, mayın 29-da Makedoniyanın və iyunun 2-də Hondurasın yığması ilə qüvvəsini sınayacaq. Oyunlar Bakı vaxtı ilə saat 21.30-da başlayacaq.

Millimiz qələbə qazanıb
Çimərlik futbolu üzrə Azərbaycan milli komandası Soçidə təşkil olunmuş təlim-məşq toplanışı çərçivəsində yoxlama oyunu keçirib. "Soçi" klubu ilə qarşılaşan millimiz 15:3 hesabı ilə qalib gəlib. Elşad Quliyevin 4 qol vurduğu, Hikmət Bağırovun het-trik, Müslüm Hüseynov və Renat Sultanovun dubl etdiyi oyunda Elvin Quliyev, İlqar Abdullayev, Namiq İsgəndərov və İlham Əzizzadə hərəyə bir dəfə fərqlənib.