Fevralın 20-də Moskvanın “Kosmos” mehmanxanasında ənənəvi “Aeroflot Open” beynəlxalq şahmat festivalına start veriləcəkdir. Sayca 16-cı dəfə təşkil olunan festival turnirləri üç qrupda keçiriləcəkdir.

“A” qrupunda 100-ə qədər şahmatçı, o cümlədən 65 qrossmeyster çıxış edəcək. Azərbaycan milli komandasının üzvü Rauf Məmmədov (2709) reytinqə görə yarış iştirakçılarının siyahısında dördüncüdür. İlk üçlüyü isə rusiyalı Vladimir Fedoseyev (2724), Hindistan təmsilçisi Santoş Vidit (2723) və Dmitri Andreykin (Rusiya, 2712) təşkil edirlər.

Doqquz turdan ibarət turnir fevralın 28-də finişə çatacaq. Qalib şahmatçı iyun ayında Dortmundda (Almaniya) keçiriləcək superturnirə vəsiqə qazanacaq.

Daha iki təmsilçimiz Vüqar Əsədli və Nərmin Xələfova isə “B” qrupunda yarışacaqlar. Bu qrupda mükafatlar uğrunda 120-dək rəqib mübarizə aparacaq.

Oqtay BAYRAMOV,
“Xalq qəzeti”