Hələ keçmiş SSRİ çempionatları və ölkə kuboku yarışlarında fədakar oyunu, möhkəm iradəsi və yenilməz qələbə əzmi ilə məşhurlaşan Donetskin "Şaxtyor" komandası indi avrokuboklarda da diqqət mərkəzindədir. Çempionlar Liqası kimi mötəbər yarışın səkkizdəbir finalına qədər irəliləyən Ukrayna futbolçuları artıq dörddəbir finala da çox yaxındırlar.
"Şaxtyor" səkkizdəbir finalın ilk görüşündə rəqib meydanında oynamasına baxmayaraq, Romada eyniadlı yerli klubla mübarizədən qalib ayrılmışdır. İtalyanlar üzərində 3:2 hesabı ilə qələbə martın 8-də öz azarkeşləri qarşısında keçirəcəyi cavab görüşündən sonra iki oyunun yekununda növbəti mərhələyə vəsiqə qazanmaq üçün Donetsk klubuna əla zəmin yaratmışdır.
Bu görüşlə eyni vaxtda keçirilmiş "Arsenal" - "Barselona" qarşılaşmasında isə qələbəni ingilislər bayram etmişlər - 2:1. İspanların Londondakı kiçik fərqlə məğlubiyyətin əvəzini Barselonada artıqlaması ilə çıxa bilib-bilməyəcəkləri martın 8-də məlum olacaq.

Oqtay BAYRAMOV, "Xalq qəzeti"