Topaz Premyer Liqasında 2017/2018-ci illər mövsümünün qış fasiləsi başa çatmışdır. Ölkənin ən yaxşı səkkiz komandası yeni qüvvə ilə çempionatın ikinci yarısında mübarizəni davam etdirməyə hazırdır.

Dörd dövrədən ibarət turnirin üçüncü dövrəsinə sabah “Zirə”–“Sumqayıt” və “Qarabağ”–“Qəbələ” görüşləri ilə start veriləcəkdir.

On beşinci turun digər iki oyunu fevralın 11-nə təyin edilmişdir. Bu görüşlərdə “Neftçi” futbolçuları “Kəpəz”i qəbul edəcəklər, “Keşlə” isə “Səbail” ilə qarşılaşacaq.

Çempionatın birinci yarısından sonra turnir cədvəlinə inamla başçılıq edən Ağdam klubunun 37 xalı vardır. İkinci–üçüncü yerləri müvafiq surətdə 31 və 30 xala malik “Qəbələ” və “Zirə” tuturlar.

Qalan yerlər bu ardıcıllıqla bölüşdürülür: “Sumqayıt” (20 xal), “Neftçi” (16), “Səbail” (13), “Keşlə” (8), “Kəpəz” (7).

“Xalq qəzeti”