Moskvada 12 rəqibin iştirakı ilə keçirilən gənc qrossmeysterlərin beynəlxalq turnirinin doqquzuncu turu Azərbaycan təmsilçisi Eltac Səfərli üçün uğursuz olmuşdur. Şahmatçımız rusiyalı Boris Qraçova uduzmuşdur.
Bu məğlubiyyət səkkiz turdan sonra iki qələbə və altı heç-heçə sayəsində yarışın dörd liderindən biri olmuş Səfərlinin turnir vəziyyətinə öz təsirini göstərmişdir. Finişə iki tur qalmış 5 xala malik Eltac liderlər Qraçov və belaruslu Sergey Jiqalkodan 1 xal geri qalır. Üçüncü-dördüncü yerləri bölüşdürən rusiyalı qrossmeysterlər Ernesto İnarkiyev və Sənan Syugirov isə 5,5 xal toplamışlar.
Lakin Azərbaycan şahmatçısı turniri mükafatçılar sırasında başa vurmaq imkanını hələ itirməmişdir. Bunun üçün o, son iki turda uğurlu nəticələrə nail olmalıdır.{nl}

Oqtay BAYRAMOV, "Xalq qəzeti"