İstanbulun “Beşiktaş” komandası vaxtından əvvəl UEFA Çempionlar Liqası turnirinin səkkizdəbir final mərhələsində oynamaq hüququnu özünə təmin etmişdir. Türkiyə futbolçuları qrup mərhələsinin sonuncudan əvvəlki, 5-ci turunda evdə Portuqaliyanın “Portu” komandası ilə heç-heçə oynamaqla (1:1) “G” qrupunda rəqibləri üçün əlçatmaz olmuşlar.

Həmin axşam bu qrupun digər görüşündə “Monako” (Fransa) “Leypsiq”ə (Almaniya) böyük hesabla uduzmuşdur–1:4.

Qrup mərhələsinin başa çatmasına bir tur qalmış 11 xala malik “Beşiktaş”ın lider mövqeyinə artıq heç nə mane ola bilməyəcək. Qrupdan səkkizdəbir finala ikinci vəsiqənin sahibi isə son turda müəyyənləşəcək. Bu vəsiqəyə “Portu” və “Leypsiq” namizəddirlər. Hazırda onların hərəsinin 7 xalı vardır. Dekabrın 6-da keçiriləcək son turda “Beşiktaş” Leypsiqdə qonaq olacaq, “Portu” isə “Monako”nu qəbul edəcək.

Oqtay BAYRAMOV,
“Xalq qəzeti”