İspaniyanın Palma-de-Malyorka şəhərində 18 məşhur şahmatçının iştirakı ilə keçirilən Qran-pri turnirinin ilk iki turunda ən yaxşı nəticəni azərbaycanlı qrossmeyster Teymur Rəcəbov, fransız Maksim Vaşye – Laqrav, Levon Aronyan (Ermənistan) və Aniş Giri (Hollandiya) göstərmişlər. Liderlər hərəyə 1,5 xal toplamışlar.

Turnirin açılış günü ağ fiqurlarla rusiyalı Aleksandr Ryazantsevlə heç-heçəyə razılaşan Rəcəbov ikinci turda qaralarla ispan Fransisko Valyexoya qalib gəlmişdir.

İki turdan sonra liderlər turnir cədvəlində ən yaxın izləyiciləri  Hikaru Nakamura (ABŞ), Pyotr Svidler, Dmitri Yakovenko, Yevgeni Tomaşevski, Ernesto İnarkiyev (hamısı Rusiya), çinli Din Lijen, Pentala Harikrişna (Hindistan), Pavel Elyanov (Ukrayna) və norveçli Con Lüdviq Hammerdən yarım xal irəli çıxmışlar. Daha dörd iştirakçının isə 0,5 xalı vardır.

Dünən keçirilən 3-cü turda azərbaycanlı qrossmeyster ağlarla Giriyə qarşı oynamışdır.

Görüş heç-heçə nəticələnmiş və Rəcəbov xallarının sayını 2-yə çatdırmışdır.

Oqtay BAYRAMOV,
“Xalq qəzeti”