Yunanıstanın Krit adasında keçirilən şahmat üzrə Avropa çempionatında turnir məsafəsinin birinci yarısı arxada qalmışdır. Qarşıda medallar uğrunda həlledici matçlar durur.

Kişilərdən ibarət komandaların çempionatının 5-ci turunda Azərbaycan millisi Çexiya şahmatçılarına 3:1 hesabı ilə qalib gələrək öz turnir vəziyyətini bir qədər də yaxşılaşdırmışdır. Bu matçda komandamızın müvəffəqiyyətini 1-ci və 4-cü taxtalarda Şəhriyar Məmmədyarovla Rauf Məmmədovun qələbələri təmin etmişdir. Digər iki taxtada Teymur Rəcəbov və Arkadi Naydiç rəqibləri ilə heç-heçəyə razılaşmışlar.

Beş turdan sonra azərbaycanlı qrossmeysterlərin komandası turnir cədvəlində 7 xalla yeddinci yerdədir. Vahid lider Xorvatiya 9, onun ən yaxın dörd izləyicisi Macarıstan, Rusiya, Ermənistan və Polşanın 8 xalı vardır. Türkiyə 6 xalla 15-cidir.

Azərbaycanın qadın şahmatçıları da 5-ci turda rəqiblərindən daha dəqiq oynamışlar. Bu turda İsrail komandası ilə qarşılaşan həmvətənlərimiz matçın taleyini birinci taxtada həll etmişlər. Zeynəb Məmmədyarova Yuliya Şvaygeri məğlubiyyətlə barışmağa məcbur etmişdir. Onun rəfiqələri Ülviyyə Fətəliyeva, Gülnar Məmmədova və Xanım Balacayeva turu hərəyə yarım xalla başa vurmuşlar. Nəticədə Azərbaycan komandasının xeyrinə 2,5:1,5 hesabı qeydə alınmışdır.

Beş matçda 6 xal toplayan millimiz turnir cədvəlinin 11-ci pilləsindədir. Lider isə 10 xala malik Rusiyadır. İkinci-beşinci yerləri hərəyə 8 xalla Gürcüstan, Ukrayna, Polşa və Türkiyə komandaları bölüşdürürlər.

Dünən hər iki çempionatda istirahət günü idi. Bu günə təyin edilmiş 6-cı turda kişi qrossmeysterlərimiz Ermənistan komandasına qarşı oynayacaqlar. Macarıstan–Xorvatiya, Polşa–Rusiya, Rumıniya–İsrail, Ukrayna–Fransa, Almaniya–Türkiyə matçları da maraqla gözlənilir.

Azərbaycanın qadınlardan ibarət komandasının isə növbəti rəqibi Rumıniya yığması olacaq. Bu turda Polşa–Rusiya, Gürcüstan–Ukrayna, İtaliya–Türkiyə matçlarının da nəticələri liderlər qrupunda  ciddi dəyişikliklərə səbəb ola bilər.

Oqtay BAYRAMOV,
“Xalq qəzeti”