Azərbaycan və Gürcüstanın birgə təşkilatçılığı ilə keçirilən və ölkəmizdə böyük voleybol bayramına çevrilən Avropa çempionatının növbəti oyun günü “A” qrupunda çıxış edən millimizlə Polşa komandasının görüşü ərəfəsində polyakların baş məşqçisi Yatsek Navrotski jurnalistlərlə söhbətində bu oyundan gözləntiləri haqqında danışarkən voleybolçularımızın imkanlarını yüksək qiymətləndirmişdi:

– Azərbaycan yığması, şübhəsiz,  cütün favoritidir. Bu komandada gözəl oyunçular var. Mən Natalya Məmmədovanı xüsusilə fərqləndirmək istərdim. Rəqibimizin hücumlarının qarşısını almaq heç də asan olmayacaq, amma biz əlimizdən gələni etməyə çalışacağıq.

İndi, görüşün arxada qaldığı bir vaxtda məşqçinin əlinin altında mahir ustalardan ibarət  komandanın olmasına baxmayaraq, oyundan əvvəl keçirdiyi həyəcanı başa düşmək çətin deyil.

Voleybolçularımız  çempionatda medallara əsas namizədlərdən biri hesab edilən rəqiblə oyunda ona müvəffəqiyyət qazanmaq üçün, əslində, heç bir ümid yeri qoymadılar. Faiq Qarayevin yetirmələri 3:0 hesabı ilə qələbə qazandıqları və onları lider mövqeyinə çıxaran oyunun birinci hissəsində (25-14), demək olar, heç bir problemlə üzləşmədilər. Sonrakı iki hissədə polşalı qonaqlarımız fəallığı xeyli artırıb daha güclü müqavimət sayəsində kiçik fərqlə uduzsalar da (21-25, 23-25), hər halda, məğlubiyyətlə barışmalı oldular. Bu görüşdə 30 xal toplayaraq matçın ən məhsuldar oyunçusu olmuş komandamızın lideri Polina Rəhimova və rəfiqələri güclü rəqibə qarşı mühüm oyunda yüksək ustalıqla yanaşı, həm də böyük əzmkarlıq göstərdilər. Əzmkarlıqlarına mükafat isə iki turdan sonra turnir cədvəlində vahid lider mövqeyi oldu.

Həmin gün “A” qrupunda keçirilmiş digər görüşdə macarlara 3:1 hesabı ilə qalib gələn Almaniya komandası Azərbaycanda ilk qələbəsini qazandı. Bu oyundan sonra qəti məlum oldu ki, qrupumuzda çempionatla birinci olaraq Macarıstan yığması vidalaşacaq. Digər qruplara gəldikdə, Tbilisidə Gürcüstan komandası Belarusa uduzmuş–0:3, İtaliya–Xorvatiya matçında isə qalib yalnız tay-breykdə müəyyənləşmişdir–3:2.

Nəticədə “B” qrupunun qalibi 8 xalla İtaliya komandası olmuş, Belarus və Xorvatiya hərəyə 5 xal toplamışlar, Gürcüstan kollektivi isə hər üç oyunda uduzmuşdur.

Milli Gimnastika Arenasında Bolqarıstan–Türkiyə görüşü də (“C” qrupu) son dərəcə gərgin mübarizə şəraitində davam etdi. Bolqarlar oyunun taleyini yalnız 20:18 hesabı ilə onların xeyrinə başa çatan “qısa hissədə” həll edə bidilər–3:2.

Göygöldə “D” qrupu komandalarının rəqabətində gözlənildiyi kimi, Serbiya voleybolçuları belçikalı rəqiblərinə qalib gələrək ardıcıl üçüncü uğurlarını bayram etmişlər, hollandlar da öz növbələrində, çexlər üzərində qələbə qazanmışlar–3:1. Serblər finişə 9, Hollandiya voleybolçuları 6, çexiyalılar 3 xalla çatmışlar, bu komandaların üçünə də məğlub olan Belçika kollektivi  çempionatı xalsız başa vurmuşdur.

İlkin mərhələ yarışları dünən axşam finişə çatmışdır. Bu gün isə artıq pley-off mərhələsinin ilk oyunları keçiriləcək: saat 18-də Belarus və Çexiya komandaları qarşılaşacaqlar, 20:30-da  Hollandiya–Xorvatiya matçını izləyəcəyik.

Azərbaycanda yüksək səviyyədə təşkili ilə hamının rəğbətini qazanan Avropa voleybol çempionatı həlledici mərhələyə qədəm qoyur. İdman ictimaiyyətimizin hədsiz maraqla izlədiyi, əslində, heç kimin biganə qalmadığı çempionatda indi uduzan komanda yarışda çıxışlarını dayandıracaq və medallara iddiaçıların sıraları getdikcə seyrələcək. Ölkəmizdə voleybol bayramının ən gözəl məqamları hələ irəlidədir. Azərbaycan millisinin də çempionatın medallarına əsas namizədlərdən biri olması voleybol pərəstişkarlarımızın bu bayrama marağını qat-qat artırır.

Oqtay BAYRAMOV,
“Xalq qəzeti”