Avropa çempionatının
azərbaycanlı liderləri

Rumıniyada keçirilən 8-18 yaşlı oğlan və qızlar arasında Avropa çempionatının mükafatları uğrunda Azərbaycan şahmat məktəbinin bir qrup yetirməsi də mübarizə aparır. Yarışın birinci yarısından sonra onların bir neçəsi öz yaş qrupunda liderlər sırasında irəliləyir.

İlk növbədə 12 yaşlı oğlanların turnirində Aydın Süleymanlı və 14 yaşlı qızlar qrupunda çıxış edən Gövhər Beydullayevanı qeyd edə bilərik. Hər iki həmyerlimiz altı turdan sonra 5,5 xal toplayaraq öz yaş qrupunda turnir cədvəlinə başçılıq edir.

On yaşlı qızların yarışında üçüncü pillədə iləliləyən Səmra Qasımova 5 xal qazanaraq rusiyalı lider Veronika Şubenkovadan 1 xal geri qalır, Ayan Allahverdiyeva 12 yaşlı qızların turnirində altı görüşdə 5 xal toplamışdır. Riyad Səmədov isə 10 yaşlı oğlanlarla görüşlərdə 5 xal qazanmışdır.

Doqquz turdan ibarət tunirlərdə dünən yeddinci raundun görüşləri keçirilmişdir.

Dünya çempionları
kubokla vidalaşmışlar

On gün əvvəl Tbilisidə şahmat üzrə Dünya Kuboku yarışında mübarizəyə qoşulan 128 rəqibdən 112-si artıq turnirdə çıxışlarını dayandırmışdır. Gürcüstan paytaxtını vaxtından əvvəl tərk edənlər sırasında hazırkı dünya çempionu Maqnus Karlsen (Norveç), keçmiş dünya çempionları Vişvanatan Anand (Hindistan), Vladimir Kramnik də (Rusiya) vardır.

Turnirdə çıxışlarını tez başa vuran iştirakçıların siyahısını bir qədər də uzatmalı olsaq, təəssüf ki, FİDE-nin növbəti Qran-pri yarışları seriyasının azərbaycanlı liderləri Şəhriyar Məmmədyarov və Teymur Rəcəbovu, habelə dünya şahmat tacı uğrunda sonuncu matçda Karlsenin rəqibi olmuş rusiyalı Sergey Karyakini, ABŞ təmsilçisi Hikaru Nakamura, ukraynalı qrossmeysterlər Pavel Elyanov, Ruslan Ponomaryovu da buraya əlavə etmək olar.

Həqiqətən, Dünya Kuboku yarışlarının öz qanunları var – uduzanlar oyundan çıxırlar.

Hazırda mübarizə meydanında yalnız sakkizdəbir finala çıxmış 16 iştirakçı qalır. Bu mərhələ matçlarına dünən start verilmiş və dörddəbir finalın iştirakçıları sentyabrın 14-də müəyyənləşəcək.

Oqtay BAYRAMOV,
“Xalq qəzeti”