UEFA Çempionlar Liqası turnirinin pley-off mərhələsinin avqustun 22-də keçirilmiş cavab görüşlərindən sonra qrup yarışlarına ilk beş vəsiqənin sevincini Şotlandiyanın “Seltik”,  İtaliyanın “Napoli”, Yunanıstanın “Olimpiakos”, İspaniyanın “Sevilya” və Sloveniyanın “Maribor” klubları yaşamışlar. İndi bu xoşbəxt komandalar yollarına Avropa klub futbolunun nəhəngləri ilə bir sırada, qrup sınaqlarında davam edəcəklər.

Pley-off mərhələsində iki oyunun yekununda şotlandlar Qazaxıstanın “Astana” komandasından üstün olmuşlar (Qlazqoda 5:0-dan sonra “Astana Arena”da 3:4), “Napoli” hər iki görüşdə Fransanın “Nitsa” klubuna iki cavabsız qolla qalib gəlmiş, Yunanıstanın “Olimpiakos”u Xorvatiyanın “Riyeka” kollektivindən güclü olmuş (ümumi 3:1 hesabı ilə), “Sevilya” futbolçuları “Başakşehir”ə (Türkiyə) qalib gəlmişlər – 2:1-dən sonra 2:2) “Maribor” isə “Hapoel”i (Beer – Şeva, İsrail) mübarizədən kənarlaşdırmışdır – evdə 1:0, səfərdə 1:2.

Oqtay BAYRAMOV,
“Xalq qəzeti”