Dünən axşam Əbu-Dabidə (Birləşmiş Ərəb Əmirlikləri) başlanmış beynəlxalq şahmat turniri öz bayrağı altına 132 iştirakçı, o cümlədən 46 qrossmeyster toplamışdır. Onların arasında Rauf Məmmədov başda olmaqla Azərbaycan şahmat məktəbinin bir qrup yetirməsi də var.

Qrossmeysterimiz reytinqə görə turnir iştirakçılarının siyahısında onunla eyni göstəriciyə malik misirli Amin Bassemlə (hər ikisinin göstəricisi 2680-dir) ikinci-üçüncü pillələrdədir. Yarışın ən yüksək reytinqli şahmatçısı isə ingilis Naycel Şortdur (2688).

Turnir İsveçrə sistemi üzrə keçirilir və doqquz turdan ibarətdir.

Əgər R.Məmmədov və digər təmsilçilərimiz ­Əbu-Dabidə çıxışlarına yenicə başlayırlarsa, onların həmvətəni Zaur Məmmədov Praqada finişə çatmış beynəlxalq turnirdən artıq qayıtmışdır. Özü də böyük uğurla!

Şahmatçımız Çexiya paytaxtında inamla çıxış edərək 9 mümkün xaldan 8 xal toplamış və birinci yeri tutmuşdur.

Oqtay BAYRAMOV,
“Xalq qəzeti”