Avqustun 25-də Almaniyanın Hamburq şəhərində starta çıxıb sentyabrın 2-dək davam edəcək böyüklər arasında boks üzrə dünya çempionatı idmanın bu növündə 2017-ci ilin ən mötəbər hadisəsi olacaq. Rio-de-Janeyro Olimpiadası – 2016-dan sonra boks pərəstişkarları ilk dəfə olaraq  planetin ən mahir rinq ustalarının çıxışlarını izləyib onların hazırlıq səviyyəsini qiymətləndirmək imkanı qazanacaqlar.

Azərbaycan gündən-günə yaxınlaşmaqda olan dünya çempionatında beş nəfərlə təmsil olunacaq. Lorenso Sotomayor (64 kq), Pərviz Bağırov (69 kq), Kamran Şahsuvarlı (75 kq), Abdulqadir Abdullayev (91 kq) və Məhəmmədrəsul Məcidov (91 kq-dan yuxarı)  bu hüququ Xarkovda keçirilmiş Avropa çempionatında uğurlu çıxışları sayəsində qazanmışlar. Hamburqda dünya çempionatına sentyabrın 2-də final görüşləri ilə yekun vurulacaq. İndi hər yerdə mundiala hazırlığın həlledici mərhələsidir.

Qarşıdakı dünya çempionatının azərbaycanlı iştirakçılarından biri Pərviz Bağırov bu günlər Belarus Respublikasının paytaxtı Minskdə Sovet İttifaqı Qəhrəmanı Viktor Liventsevin xatirəsinə həsr edilən beynəlxalq turnirdə hazırlıq səviyyəsini yoxlamışdır. Finaladək bütün rəqiblərinə qalib gələn boksçumuz yalnız həlledici görüşdə uduzaraq yarışı gümüş medalla başa vurmuşdur.

 Minsk rinqində Azərbaycanın daha dörd boksçusu fəxri kürsüyə yüksəlməyi bacarmışdır. Umud Rüstəmov (56 kq) kişilərin yarışında, Anaxanım Ağayeva (51 kq), Məhsəti Həmzəyeva (57 kq) və Şəhla Allahverdiyeva (75 kq) qadınların turnirində bürünc mükafatçı olmuşlar.

Oqtay BAYRAMOV,
“Xalq qəzeti”