Rusiya stadionlarında iki həftə davam edən FİFA Konfederasiyalar Kuboku turniri ötən bazar günü Sankt-Peterburqda Çili – Almaniya görüşü ilə başa çatmışdır. “Sankt-Peterburq” stadionunda oynanılmış həlledici matçın taleyini 20-ci dəqiqədə almanların hücumçusu Lars Ştindlin vurdugu yeganə qol həll etmiş və DÇ-2018-in seçmə mərhələsində Azərbaycan millisinin rəqibi Almaniya yığması fəxri mükafatı öz Vətəninə aparmışdır.

Üçüncü yer uğrunda görüş isə elə həmin gün Moskvanın “Spartak” stadionunda keçirilmişdir. Bu oyunda Portuqaliya komandası əlavə vaxtda Meksika  millisi üzərində qələbə qazanmışdır – 2:1.

Dörd görüşdə rəqib qapılarına 3 top vuran almaniyalı hücumçu Tino Verner turnirin ən məhsuldar oyunçusu hesab edilmişdir. Onun komanda yoldaşları Leon Qoretska və Lars Ştindl də hərəyə 3 qolun müəllifi olmuşlar. Əlavə göstəricilərə görə, (iki məhsuldar ötürmə) üstünlük Vernerə verilmişdir.

Ukraynalı Nikolay Balakin

UEFA Avropa Liqası yarışlarının birinci təsnifat mərhələsinə Serbiyada “Mladost” klubu üzərində inamlı qələbə ilə başlayan (3:0) Azərbaycanın “İnter “ komandasının bu rəqiblə cavab görüşünü ukraynalı hakimlər briqadası idarə edəcəkdir. Baş hakim funksiyasını Nikolay Balakin yerinə yetirəcək.

Oyun iyulun 6-da “Dalğa Arena”da keçiriləcək və saat 21-də başlanacaq.

Oqtay BAYRAMOV,
“Xalq qəzeti”