Dünyaca məşhur ABŞ müğənnisi, superstar Meraya Keri “Formula-1” yarışlarının  sonuncu günündə -- iyunun 25-də Bakıda konsert verəcək.

M. Keri paytaxtımıza toplaşacaq avtoidman həvəskarları üçün Azərbaycan Qran-prisinin podium mərasimindən sonra Dənizkənarı Milli Parkda yerləşən böyük səhnədə ən sevilən ifalarını səsləndirəcək.

Karyerasının zirvəsində olduğu dövrdə Las-Veqasda il boyu davam edən silsilə konsert proqramlarına ara verərək Bakıya gələcək dünya ulduzu yarış başa çatdıqdan sonra “Formula-1” azarkeşlərinə unudulmaz anlar yaşadacaq. Müğənnilik karyerasında ifa etdiyi möhtəşəm mahnıları ilə ABŞ-da 18 dəfə ən yüksək pillədə yer alan Meraya Keri Bakıda ona dünya şöhrəti qazandırmış “Hero”, “Fantasy”, “Always Be My Baby”, “We Belong Together” və mahnılarını səsləndirəcək.

Bakı Şəhər Halqasının icraçı direktoru Arif Rəhimov Meraya Kerinin Bakı konserti barədə danışarkən deyib: “Biz musiqi tarixində böyük uğur qazanmış xanım müğənnini “Formula-1” yarışının sonuncu günündə qarşılamaqdan böyük qürur duyuruq. Meraya Keri bütün dünyada milyonlarla insanın dillər əzbəri olmuş mahnıları ilə seçilən möhtəşəm səsə malik məşhur ifaçıdır. Onun ən çox sevilən mahnılarını ifa edəcəyi konsert “ Formula-1”  həftəsonunu ən gözəl şəkildə yekunlaşdıran mükəmməl bir final olacaq. Biz bu tədbiri bütün dünya ilə birlikdə yüksək səviyyədə qeyd etməyə hazırıq“.

 M.MÜKƏRRƏMOĞLU,
 “Xalq qəzeti”