Azərbaycanın ən yaxşı boksçuları növbəti çətin sınağa başlamışlar. Dünən Ukraynanın Xarkov şəhərində starta çıxıb iyunun 24-dək davam edəcək Avropa çempionatının iştirakçıları bu məsul yarışda medallarla yanaşı, qarşıdakı payızda Hamburqda (Almaniya) keçiriləcək dünya çempionatına lisenziya uğrunda mübarizə aparırlar.

Xarkovun “Lokomotiv” İdman Sarayının rinqində 40-dan çox ölkə boksçularının ilkin mərhələ görüşləri iyunun 20-dək davam edəcək. Qaliblər on çəki dərəcəsində müəyyənləşəcək. Final görüşləri iyunun
24-nə təyin edilmişdir.

Avropa çempionatında Azərbaycanın idman şərəfini Məsud Yusifzadə (49 kq), Elvin Məmişzadə (52 kq), Tayfur Əliyev (56 kq), Cavid Çələbiyev (60 kq), Lorenso Sotomayor (64 kq), Pərviz Bağırov (69 kq), Kamran Şahsuvarlı (75 kq), Eldar Quliyev (81 kq), Abdulqadir Abdullayev (91 kq) və Məhəmmədrəsul Məcidov (91 kq-dan yuxarı) qoruyurlar.

Komandamızdan birinci olaraq mübarizəyə Çələbiyev və Quliyev başlayacaqlar. Onlar bu gün müvafiq surətdə litvalı və rusiyalı rəqiblərlə döyüşəcəklər.

Oqtay BAYRAMOV,
 “Xalq qəzeti”