Minskdə 400-ə qədər şahmatçının iştirakı ilə keçirilən kişilər arasında 18-ci Avropa çempionatının ilk dörd turunda Azərbaycan təmsilçiləri arasında ən yaxşı nəticəni Arkadi Naydiç göstərmişdir.

O üç görüşdə qələbə, bir oyunda heç-heçə sayəsində 3,5 xal toplamışdır. Naydiç onunla eyni nəticə göstərən daha 17 iştirakçı ilə 2-19-cu yerləri bölüşdürür.

Dörd turdan sonra Azərbaycanın digər şahmatçılarından Rauf Məmmədov və Nicat Abasovun hərəyə 3 xalı vardır. Turnir cədvəlinə ukraynalı qrossmeyster Yuri Kuzubov başçılıq edir. Lider keçirdiyi dörd görüşün hamısından qalib ayrılmışdır.

On bir turdan ibarət turnirdə dünən axşam beşinci turun görüşləri oynanılmışdır. Çempionatda 1–22-ci yerləri tutan şahmatçılar sentyabrda Gürcüstanda keçiriləcək Dünya kuboku turnirinə vəsiqə qazanacaqlar.

Oqtay BAYRAMOV,
“Xalq qəzeti”