Azərbaycanda IV İslam Həmrəyliyi Oyunları başa çatdı. Müxtəlif idman növlərində qüvvələrini sınayan müsəlman ölkələrindən gələn idmançılar arasında qardaş türkiyəli təmsilçilər ümumi olaraq 195 medal qazandılar.  Stolüstü tennis üzrə İslam Oyunlarının qızıl mükafatına layiq görülmüş Mələk Hu qəzetimizə açıqlama verdi:

– Azərbaycanda İslamiada mükəmməl keçirildi. Avropa Oyunları hansı səviyyədə idisə, bu Oyunlar da eləcə, hətta, deyərdim ki, daha da yüksək tərzdə keçirildi. Azərbaycanda idman qurğuları, yüksək şəraitli təlim-məşq zalları, idman mərkəzləri istifadəyə verilib, burada idmançıların gələcəyi üçün böyük potensial var. Yaradılan şəraitdən azərbaycanlı gənclər maksimum yararlanmalıdırlar.

M.Hu yarışlar zamanı qələbəsinin təmin olunmasında əzmkarlığının rol oynadığını bildirdi: “Rəqiblərimin fəndləri mənim üçün gözlənilməz olsa da, onlara qalib gəlmək üçün əzmkarlıq göstərdim. Uğur qazanmaq üçün ciddi hazırlaşmışdım. Birinci yeri tutduğum üçün  çox sevinirəm”.

İslam Həmrəyliyi Oyunlarında ilk dəfə çıxış etdiyini vurğulayan Mələk Hu dedi: “Əslində, buraya gələndə çempion olmağı hədəfləməmişdim. Amma İslam Oyunlarının adi bir yarış olmadığını və tədbirə ciddi rəqiblərin qatılacağını öyrəndikdən sonra qalibiyyətin asan başa gəlməyəcəyini düşündüm. Bununla belə yarışın qalibi oldum. Qalibiyyət mənim üçün inanılmaz bir hissdir”.

Təqdim etdi:
Anar TURAN,
“Xalq qəzeti”