Qadın güləşinin parlaq simalarından biri Mariya Stadnik IV İslamiadada da fəxri kürsünün ən yüksək pilləsində qərarlaşıb çoxsaylı azarkeşlərini sevindirdi. Olimpiya Oyunlarının bürünc, ikiqat gümüş mükafatçısı, dünya çempionu, altı dəfə Avropa çempionu, ilk Avropa Oyunlarının qalibi IV İslam Həmrəyliyi Oyunları ərəfəsində bu mötəbər yarışda da mütləq qızıl medal qazanacağını demişdi. Bu turnirdən bir neçə gün əvvəl isə Serbiyada keçirilən qitə birinciliyində 6-cı dəfə çempionluq sevincini yaşamışdı.

İslamiadada qələbəsindən sonra yarış təəssüratlarını bizimlə bölüşən xanım idmançımız bunları dedi: “IV İslamiada çox yüksək səviyyədə təşkil edilmişdi və Azərbaycan komandası bu nüfuzlu yarışda möhtəşəm qələbə əldə etdi. Güləşçilərimizin, xüsusilə qadın pəhləvanlarımızın nailiyyətlərini isə xüsusi vurğulayardım. Görüşlərimin hamısını qələbə ilə başa vurduğum üçün çox sevinirəm. Bu yarışlarda mütləq birinci yeri tutmalıydım. Çünki bu mötəbər turnir, həm də doğma divarlar arasında keçirilirdi. Azarkeşlərimiz bizi böyük coşqu ilə dəstəkləyirdilər. Bütün zal Azərbaycan himnini oxuyurdu. IV İslam Həmrəyliyi Oyunlarından qalan xoş təəssüratlar unudulmaz anlara çevrildi”.

Xanım güləşçimiz əldə edilən nailiyyətlərin onları arxayınlaşdırmadığını da vurğuladı: “Azərbaycan komandası müsəlman aləminin ən güclüsü adına layiq görüldü. Amma əldə edilmiş uğur bizi arxayınlaşdırmır. Yeni nailiyyətlər qazanmaq üçün isə daha yüksək zirvələr fəth etməliyik. Əminəm ki, qələbələrimiz gələcəkdə də bol olacaq”.

Leyla QURBANOVA,
“Xalq qəzeti”