Mayın 12-də start götürən IV İslam Həmrəyliyi Oyunları artıq başa çatdı. Yarışlarda liderlik qazanan Azərbaycan idmançıları arasında uşu-sanda döyüş növünün də təmsilçiləri var. İslamiadanın gümüş mükafatçısı Vüqar Kərəmov qəzetimizə açıqlama verib:

– Yetmiş kiloqram çəki dərəcəsində mübarizə apardım və həlledici görüşdə İran idmançısı Saeid Fazeli ilə qarşılaşmada məğlub olaraq,  gümüş medalla kifayətləndim. Lakin bu idmandır. Sabah hər şey ola bilər. Gümüş medalı qazandığım üçün çox sevinirəm. Gələcəkdə bu idman növündə ölkəmə qızıl medallar qazanmağı qarşıya məqsəd qoymuşam. Oyunlar hər yerdə böyük əks-səda yaradıb. Bu gün müsəlman aləmində hamı Azərbaycandan, bizim idmançılardan danışır. Çünki belə böyük və çoxsaylı dövlətlərin təmsil olunduğu yarışlarda 75 qızıl, 50 gümüş və 37 bürünc əldə etmişik.  Ona görə də, hazırda Azərbaycan idmanı haqqında ən yüksək fikirləri söyləyirlər. Hesab edirəm ki,  Azərbaycanda uzun müddət idmançılara göstərilən diqqət və qayğının bu gün bəhrəsini görürük. Əks halda ölkəmiz bu qədər medal qazana bilməzdi. Biz bununla fəxr etməliyik. İnanıram ki, bundan sonra da Azərbaycan belə mötəbər yarışlara ev sahibliyi edəcək.

Qələmə aldı:
Anar TURAN,
“Xalq qəzeti”