Azərbaycanlı idman həvəskarları İslamiada günlərində qadın həndbol və voleybol komandalarımızla yanaşı, basketbolçu kişi və qadınların, habelə kişilərdən ibarət voleybol komandamızın da çıxışlarından və göstərdikləri nəticələrdən razı qalmaya bilməzlər. Bir neçə gün əvvəl Azərbaycanın qadınlardan ibarət həndbol və voleybol komandalarının IV İslam Həmrəyliyi Oyunlarının qızıl medallarını qazanmalarına nə qədər sevinmişdiksə, futbol millimizlə eyni gündə çempionluq sevinci yaşayan hər iki basketbol komandamız da final matçından qələbə ilə ayrıldı.

Əvvəlcə qadın basketbolçular Diana Ulyanova, Tatyana Deniskina, Aleksandra Vollenxauer və Mersedes Uolker Mali yığmasını 13:7 hesabı ilə məğlubiyyətə uğratdılar, bir qədər sonra isə Amil Həmzəyev, Zaur Paşayev, Orxan Aydın və Marşall Mozesdən ibarət heyət Qətər komandasına qalib gəldi (13:9) və  hər iki kollektiv qarşılarında duran vəzifəni yüksək məsuliyyət hissi ilə yerinə yetirib adlarını IV İslamiadanın çempionları siyahısına yazdırdılar.

Voleybolçu kişilər də “Kristal Zal”da fəxri kürsünün zirvəsinə yüksəlmək üçün əllərindən gələni etdilər. Onlar finalda İran komandasına uduzub çempion ola bilməsələr də, gümüş medallar baş məşqçi Fərid Cəlalovun komandası üçün kiçik müvəffəqiyyət deyil.

Bir sözlə, artıq tarixə çevrilmiş IV İslam Həmrəyliyi Oyunlarının həndbol, voleybol, basketbol və əlbəttə ki, futbol yarışlarının medalları sübut etdi ki, Azərbaycanda idmanın komanda növlərinin də inkişafı istiqamətində daim məqsədyönlü iş aparılır.

Oqtay BAYRAMOV,
“Xalq qəzeti”