Bu axşam IV İslam Həmrəyliyi Oyunlarının futbol turnirinin qalibi məlum olacaq. Həlledici final görüşündə Azərbaycan və Oman komandaları qarşılaşacaqlar. Gürcüstanlı hakimlər briqadasının idarə edəcəyi oyun Tofiq Bəhramov adına Respublika Stadionunda keçiriləcək və saat 21:00-da başlanacaq.

Azərbaycan futbolçuları finalda qızıl medallar uğrunda mübarizə aparmaq hüququnu yarımfinalda Əlcəzair yığması üzərində qələbə (2:0) sayəsində qazanmışlar, Oman komandası isə finalın astanasında Kamerun futbolçularına penaltilər seriyasında qalib gəlmişdir–4:3 (əsas vaxtda hesab açılmamışdır).

Millimiz İslamiada turnirində keçirdiyi dörd görüşdən ikisində Kamerun və Mərakeş ilə heç-heçə oynamış (0:0), Səudiyyə Ərəbistanı komandasına iki cavabsız qolla qalib gəlmiş və yarımfinalda Əlcəzair yığması üzərində həmin hesabla qələbə qazanmışdır.

Azərbaycan futbolçuları onları finala yüksəldən yolda böyük əzmkarlıq göstərmiş, müdafiədə etibarlı və hücumda kifayət qədər məhsuldar oyun nümayiş etdirmişlər. İndi qalır son sınaqdan da şərəflə çıxıb IV İslam Həmrəyliyi Oyunlarının çempionu olmaq və futbol ictimaiyyətimizi, bütün Azərbaycanı qızıl medallarla sevindirmək.

Oqtay BAYRAMOV,
“Xalq qəzeti”