Azərbaycanın hər iki basketbol komandası (3x3) qrup mərhələsində uğurla çıxış edərək IV İslam Həmrəyliyi Oyunlarının medalları uğrunda mübarizəni davam etdirmək hüququ qazanmışdır.

Qadın basketbolçularımız ilkin mərhələdə keçirdikləri üç oyundan ikisində Türkmənistan və Əlcəzair komandalarına müvafiq surətdə 16:7 və 20:14 hesabı ilə qalib gəlmiş, Mali idmançılarına isə uduzmuşlar (8:11).

Nəticədə “B” qrupunda ilk iki yeri tutan  Mali və Azərbaycan komandaları pley-off mərhələsinə çıxmışlar.

Kişilərin turnirində isə basketbolçularımız ilkin mərhələdə hər üç oyundan qalib ayrılmışlar.  Türkiyə komandasını 17:10, Türkmənistan idmançılarını 17:16 və Pakistan yığmasını 22:13 hesabı ilə məğlubiyyətə uğradan Azərbaycan komandası dörddəbir finala birinci yerin sahibi kimi çıxmışdır.

Dörddəbir finalda hər iki komandamızın rəqibi İndoneziya basketbolçuları olmuşlar. Bu görüşlər dünən axşam keçirilmişdir.

İslamiadanın çempionu, habelə gümüş və bürünc mükafatçılar bu günə təyin edilmiş üçüncü yer uğrunda oyundan və həlledici final görüşündən  sonra məlum olacaq.