Türkiyəli tennisçi Altuğ Çelikbilek IV İslam Həmrəyliyi Oyunlarının qızıl medalçılarından biridir. Deyir ki, qardaş Azərbaycanda olduğu günlərdə özünü Türkiyədəki kimi hiss edir. Özünü və həmyerlilərini əldə etdikləri qələbəyə ruhlandıran azərbaycanlı azarkeşlərə minnətdarlığını bildirir. 

Altuğ Çelikbilek daha sonra qeyd edir: – Düzdür, hələ ki, Bakını gəzməyə  geniş imkan olmayıb. Lakin mayın 22-də dostlarımla birgə bağlanış mərasimindən əvvəl şəhərlə ətraflı tanış olmaq fikrindəyik. Bununla belə, ilk gündən paytaxtla qısa tanışlıqdan buradakı təmizlik, səliqə-sahman, insanların qonaqpərvərliyi bizdə xoş təəssürat yaradıb. İslam Oyunlarının yüksək səviyyədə təşkili də bizi sevindirib. Mən bu işdə zəhməti olan hər kəsə təşəkkür etmək istəyirəm. Bu nüfuzlu idman yarışında nailiyyətlərimlə fəxr edirəm.

Yeri gəlmişkən, bir məqamı da xatırladım. IV İslam Həmrəyliyi Oyunları müxtəlif ölkələri Bakıda həmrəylik bayrağı altında bir araya gətirib. İslam Oyunları özündə həmrəyliyi, dostluğu və sülhü birləşdirir. Oyunların açılış mərasiminin möhtəşəmliyi məndə ifixar hissi doğurdu. Həmin saatları heç zaman unutmayacağam. Yaddaşımda tarixi bir gün kimi yaşayacaq. Mərasimdə məni ən çox heyrətləndirən Azərbaycan və onun qədim tarixi haqqında göstərilən videoçarx oldu. Bu çarx vasitəsilə Azərbaycanın zəngin, şərəfli keçmişə, bu gün isə möhtəşəm iqtisadi gücə və inkişafa malik olduğunu bildim.

Onu da deyim ki, İslam Həmrəyliyi Oyunları sayəsində müxtəlif ölkələrin komandalarını yaxından tanıdıq, təcrübə mübadiləsi aparmaq imkanı qazandıq.

Sonda vurğulamaq istərdim ki, respublikanızda idmana dövlət tərəfindən böyük qayğı göstərilir. İdmanın inkişafı dövlət siyasətinin prioritet istiqamətlərindən biri kimi diqqət mərkəzində saxlanılır. Bunun nəticəsidir ki, Azərbaycan dünyada bir idman ölkəsi kimi tanınır, irimiqyaslı yarışlara yüksək səviyyədə ev sahibliyi edir. İdmançılarınız isə beynəlxalq arenada sanballı qələbələr əldə edirlər.

Söhbəti qələmə aldı:
Vaqif BAYRAMOV,
 “Xalq qəzeti”