Bakı Olimpiya Stadionunda təşkil olunan  IV İslam Həmrəyliyi Oyunlarının təntənəli açılış mərasimi bütövlükdə İslamiadanın tarixində ən möhtəşəm bayram kimi qalacaq.

Dünyanın diqqət mərkəzində olan bu idman yarışı ilə əlaqədar aparılan yüksək səviyyəli hazırlıq işləri açılış mərasimində özünü bir daha büruzə verdi. Bunu tədbiri izləyən qonaqlar da etiraf edirlər.

İslam Həmrəyliyi Federasiyasının baş katibi  Faysal Əbduləziz əl– Nassar Oyunların açılış mərasimini izləməsindən qürur hissi keçirdiyini dedi: “ Çox möhtəşəm idi. Sanki qeyri-adi bir tamaşa idi. Bakıdakı açılış mərasimi  İslamiadanın tarixinə əbədi həkk olunacaq. Açılış mərasimi də təsdiqlədi ki, Azərbaycan bu Oyunların təşkilinə və açılış mərasiminə ən yüksək səviyyədə hazırlaşıb”.

Baş katib yarışların keçiriləcəyi idman arenalarında gözəl şərait yaradıldığını bildirdi. Bu, xalqlar arasında həmrəylik əlaqələrini, sülh və dostluq münasibətlərini tərənnüm edir. Azərbaycan bu yolda bütün imkanlarını ortaya qoyub və istəyinə nail olub. “IV İslam Həmrəyliyi Oyunlarının belə yüksək səviyyədə keçirilməsi üçün göstərdiyi qətiyyətli dəstəyə görə Prezident İlham Əliyevə və bu Oyunların Təşkilat Komitəsinin sədri Mehriban xanım Əliyevaya minnətdarlığımı bildirirəm. Mən Bakıda yüksək səviyyəli hazırlıq işlərinin şahidi oldum. Açılış mərasimi isə hələ uzun müddət xatirələrdə qalacaq”.

Söhbəti qələmə aldı:
Əliqismət BƏDƏLOV,
“Xalq qəzeti”