IV İslam Həmrəyliyi Oyunlarının çempionları–Azərbaycanın qadınlardan ibarət yığma komandasının voleybolçuları bu il qarşıda duran üç məqsəddən birinə artıq çatmışlar. “Kristal Zal”da keçirilən yarışda bizim qızlar İslamiadanın qızıl medallarına layiq olduqlarını inamla sübuta yetirdilər, pərəstişkarları da öz növbələrində bu müvəffəqiyyətə ürəkdən sevindilər.

İndi Faiq Qarayevin komandası növbəti sınaq ərəfəsindədir. Tezliklə, mayın 30-da Bakı İdman Sarayında dünya çempionatı seçmə yarışlarının ikinci mərhələsinə start veriləcəkdir. Bu yarışda voleybolçularımızın rəqibləri Ukrayna, Danimarka, İsrail, Hollandiya və Norveç komandaları olacaq.

Turnir iştirakçıları hərəyə beş oyun keçirəcəklər. Azərbaycan voleybolçuları yarışa mayın 30-da Danimarka idmançılarına qarşı görüşlə başlayacaq, son oyunu isə iyunun 3-də Hollandiya ilə keçirəcəklər.

Qrupun qalibi dünya çempionatının final mərhələsinə birbaşa vəsiqə qazanmaq məqsədinə çatacaq, ikinci yerin sahibi isə pley-off  görüşlərində oynayacaq.

Paytaxtımızda voleybol bayramı dünya çempionatının seçmə görüşləri ilə bitməyəcək. Həmin oyunlardan sonra Azərbaycan komandası sentyabrda ölkəmizin Gürcüstanla birgə təşkil edəcəyi Avropa çempionatının final mərhələsində oynayacaq.

Oqtay BAYRAMOV,
“Xalq qəzeti”