Bakıda təşkil olunan Dördüncü İslam Həmrəyliyi Oyunları bütün İslam dünyasında qürur hissi doğurur. Xüsusən paytaxt sakinləri yarışları böyük coşqu ilə qarşılayırlar. 88 nömrəli marşrutda yarışlar haqqında iki gənc arasındakı söhbəti qeyri-ixtiyari olaraq dinlədim. Gənclərin İslamiada haqqında səsləndirdiyi müsbət fikirlər çox xoş idi.

Yüngül atletika yarışlarını qızıl medalla bitirən İraq atleti Mustafa Əlsamahla Bakı Olimpiya Stadionunda görüşdük.
Mustafa Əlsamah bizimlə fikirlərini bölüşdü.

Diskatma yarışının qalibi çempionluq hissinin qürurverici olduğunu bildirdi. Yarışların yüksək səviyyədə təşkil olunduğunu vurğuladı. Qeyd etdi ki,  paytaxt Bakıda bu cür möhtəşəm idman saraylarının, müxtəlif təyinatlı idman mərkəzlərinin tikilərək idmançıların ixtiyarına verilməsi ölkənizdə idmana göstərilən qayğının bariz nümunəsidir.

Mustafa Əlsamah Bakıda qazandığı uğurun onun üçün çox böyük məna kəsb etdiyini bildirdi. O, qələbəsinin İslamiadada qazanılmasının xüsusi önəm daşıdığını dedi.

Paytaxt Bakıya gəlincə qonaq bildirdi ki, Bakı şəhəri onun eşitdiyindən və təsəvvür etdiyindən də gözəldir. Yarışlar ərəfəsində idmançıların təhlükəsizliyinin yüksək səviyyədə təmin edildiyini bildirən Əlsamah qeyd etdi ki, özümüzü evimizdəki kimi hiss edirik.

Hazırladı:
Elçin ABBASOV, “Xalq qəzeti”