Dördüncü İslam Həmrəyliyi Oyunlarında uğurla çıxış  edən Azərbaycan futbolçuları xalqımızı sevindirməkdə davam edirlər.

“Bayıl Arena”da ilkin mərhələ yarışlarında Kamerun, Mərakeş və Səudiyyə Ərəbistanı komandaları ilə görüşlərin yekununda növbəti mərhələdə oynamaq hüququ qazanan futbolçularımız bu dəfə irəliyə doğru daha iri, daha mühüm addım atmışlar.

Yaşar Vahabzadənin komandası dünənki müvəffəqiyyətinə “Dalğa Arena”da sevinmişdir. Futbolçularımız Əlcəzair yığmasına qarşı yarımfinal görüşündə müdafiədə  etibarlı, hücumda  məhsuldar oyun  nümayiş etdirərək rəqiblərini iki cavabsız qolla məğlubiyyətə uğratmışlar – 2:0.

Qələbə toplarını birinci hissədə Ruslan Abışov, fasilədən sonra isə Məqsəd İsayev vurmuşlar. Azərbaycan  komandası artıq finaldadır!

Dünən axşam ikinci yarımfinalda Kamerun və  Oman  komandaları qarşılaşmışlar.

Final görüşü mayın 21-də keçiriləcəkdir.

O.BAYRAMOV,
“Xalq qəzeti”