Moskvada 18 qrossmeysterin iştirakı ilə keçirilən FİDE-nin “Qran-pri” yarışları seriyasından ikinci mərhələnin ilk dörd turunda ən yaxşı nəticəni Azərbaycan şahmatının lideri Şəhriyar Məmmədyarov və çinli Din Lijen göstərmişlər. Onlar hərəyə 3 xal toplamışlar.

Məmmədyarov startda iki heç-heçədən sonra növbəti turlarda ingiltərəli Maykl Adamsa və Birləşmiş Ərəb Əmirliklərinin təmsilçisi Saleh Salemə qalib gəlmişdir.

Turnirdəki digər şahmatçımız Teymur Rəcəbov da yarış məsafəsinin arxada qalan hissəsində nəticəsindən razı qala bilər –üç heç-heçə və dördüncü turda ispaniyalı Fransisko Valyexo üzərində qələbə. Bu müvəffəqiyyətdən sonra xal ehtiyatını 2,5-ə çatdıran Rəcəbov onunla yanaşı addımlayan Pyotr Svidlerlə (Rusiya) sonrakı yerləri bölüşdürür. Fransız Maksim Vaşye-Laqrav və daha bir qrup iştirakçı 2 xal toplamışdır.

Dünən keçirilən beşinci turda Məmmədyarov Din Lijenlə, Rəcəbov isə Svidlerlə görüşmüşlər.

Oqtay BAYRAMOV,
 “Xalq qəzeti”