Dünən Bakıda IV İslam Həmrəyliyi Oyunlarının rəsmi açılış mərasimi olub. Bu möhtəşəm idman hadisəsini canlı seyr edənlər arasında Türkiyənin bədii gimnastika üzrə yığma komandasının məşqçisi Ayşin Erten də var.

Əməkdaşımız türkiyəli məşqçi ilə görüşərək ondan bu nüfuzlu idman yarışı ilə əlaqədar öz arzu və  gözləntilərini qəzetimizin oxucuları ilə bölüşməsini xahiş edib. Türkiyəli məşqçi bunları deyib:  

– Rəsmi açılış mərasimi həqiqətən qeyri-adi idi. Bakı bu gün dünyanın idman mərkəzlərindən birinə çevrilib. Xəzərin sahilindəki bu əsrarəngiz şəhərə gəlişimdən çox məmnunam.

Bizim bədii gimnastika üzrə komandamıza üç idmançı daxildir. Bunlar Selen Bektaş, Ecem Cahkaya və Başak Nida Karaevlidir. Onların hər birinin proqramda nəzərdə tutulanları uğurla yerinə yetirəcəyinə ümid edirəm.

Qeyd etmək istərdim ki, biz bu yarışlara ciddi hazırlaşmışıq. Türkiyənin bədii gimnastika üzrə yığma komandasının məşqçisi kimi mən yetirmələrimin IV İslam Həmrəyliyi Oyunlarında uğur qazanacağına əminəm. 

Bütövlükdə, yarışların gərgin və ədalətli idman mübarizəsi  şəraitində  keçəcəyinə şübhə etmirəm. İdmançılarımız bu yarışlara böyük həvəslə qatılacaqlar. Biz yarışlarda ən azı bir medal qazanmaq əzmindəyik.

Yeri gəlmişkən, bədii gimnastika ilk dəfədir ki, İslam Həmrəyliyi Oyunlarının proqramına daxil edilib. Biz buna çox sevinirik. Hesab edirəm ki, yarışlarda əsas rəqibimiz azərbaycanlı gimnastlar olacaqlar. Bilirəm ki, ev sahibləri istedadlı və təcrübəli idmançılardan ibarət komanda ilə təmsil olunacaq. Mən azərbaycanlı həmkarlarıma yarışlarda uğurlar arzulayıram.

Bir məqamı da vurğulamaq istərdim. Çox şadam ki, növbəti İslam Həmrəyliyi Oyunları məhz Bakıda keçirilir. Bakı şəhəri türkiyəli idmançılar üçün çox əziz və doğma bir yerdir. Burada özümüzü Vətənimizdə olduğu kimi hiss edirik. Bakıda hər zaman olduğu kimi, bu dəfə də hər şey yüksək səviyyədədir. Belə ki, burada bütün idmançılar üçün hər cür şərait yaradılıb. Buna görə də bu məsul yarışların təşkilatçılarına bu başdan dərin təşəkkür edirəm.

Sonda bir daha vurğulamaq istəyirəm. Biz belə bir nüfuzlu tədbirə həvəslə qatılmaqla bərabər, təbii ki, yarışlarda uğur  qazanmaq əzmindəyik. İnşallah, hər şey yaxşı olacaq!

Söhbəti qələmə aldı:
Məsaim ABDULLAYEV,
“Xalq qəzeti”