Azərbaycanın idman gimnastikası üzrə oğlanlardan ibarət  komandası  IV İslam Həmrəyliyi Oyunlarına səylə hazırlaşıb. Yığmanın üzvü   Murad Ağarzayev müsahibəsində  bildirib  ki,  medal  qazanmaq və ən yaxşı nəticələr göstərmək üçün bütün səylərimizi əsirgəməyəcəyik. Çalışacağıq ki,  yaxşı çıxış edək  və komanda hesabında qalib gələk.

İdmançının sözlərinə görə, Oyunlara çox sayda güclü   gimnastlar gələcək: "Türkiyəli, özbəkistanlı idmançılar çox güclüdürlər. İran, İraq və Qətərin yaxşı komandaları var. Fikirləşirəm ki, İran azı bir qızıl medal qazanacaq". Eyni zamanda,  M.Ağarzayev qeyd edib ki, güclü rəqiblər Azərbaycan gimnastlarını qorxutmur, onlar öz güclərinə əmindirlər. Əsas  odur ki, zədələr olmasın. O, IV İslam Həmrəyliyi Oyunlarında   sərbəst hərəkətlərdə, dayaq tullanmada və komanda hesabında ən azı 3 medal qazanmaq  fikrindədir. Gimnast  bu medallardan azı birinin qızıl olacağına ümid edir.

Komandanın digər idmançısı Bense Talas öz növbəsində  bildirib  ki,  Azərbaycanın  idman gimnastları 6 alətdə çıxış edəcəklər. Onun sözlərinə görə, komanda bütün alətlərdə kifayət qədər yaxşı çıxış edir.

Oyunlarda ölkəmizi təmsil edəcək daha bir gimnast  Teymur Bayramov isə deyib ki, komandamızın yüksək yer tuta bilməsi üçün  var qüvvə ilə mübarizə aparacaqlar.  O, yarışlarda ən güclü rəqib Türkiyəni hesab edir: "Amma biz qələbə qazanmaq üçün maksimum gücümüzü sərf edəcəyik".

T.Bayramov, həmçinin bildirib  ki, Azərbaycan gimnastları üçün IV İslam Həmrəyliyi Oyunlarında azarkeş dəstəyi böyük kömək olacaq: "Bizə azarkeşlik edin. Dəstək bizə daha yaxşı çıxış etməyə kömək edəcək". 

Ülviyyə VAHİDQIZI,
“Xalq qəzeti”