Naxçıvanda Azərbaycan xalqının ümummilli lideri Heydər Əliyevin xatirəsinə həsr olunmuş beynəlxalq şahmat festivalı davam edir. Bu ənənəvi festival üç turniri özündə birləşdirir. Ən güclülərin yarışdığı “A” qrupunda mükafatlar uğrunda 50-yə qədər rəqib, o cümlədən 17 qrossmeyster mübarizə aparır.

Reytinqə görə iştirakçıların siyahısına azərbaycanlı qrossmeyster Eltac Səfərli (2668) başçılıq edir. Birinci beşliyə, həmçinin Sergey Volkov (Rusiya, 2617), şahmatçımız Nicat Abasov (2575), İqor Xenkin (Almaniya, 2568) və  Nikita Mayorov (Belarus, 2527) daxildirlər.

Üç turdan sonra turnir cədvəlinin birinci – doqquzuncu  pillələrində irəliləyən Azərbaycan  şahmatçıları Abasov, Vüqar Əsədli, Misrəddin İsgəndərov, Ülvi Sadıqov, Gülnar Məmmədova, habelə Belarus təmsilçiləri Vadim Malaxatko, Mayorov, rusiyalı Vladimir Burmakin və Xenkin (Almaniya) hərəyə 2,5  xal toplamışlar.

Doqquz  turdan ibarət turnirdə dünən  rəqiblər dördüncü raundun görüşlərində qarşılaşmışlar.

Oqtay BAYRAMOV,
“Xalq qəzeti”