Azərbaycanın qadın güləşçiləri Serbiyanın Novi Sad şəhərində keçirilən Avropa çempionatında daha bir medal qazanmışlar. Turnirin ikinci günü fəxri kürsüyə 60 kq çəki dərəcəsində çıxış edən Tatyana Omelçenko dəvət olunmuşdur. Güləşçimiz bürünc mükafat uğrunda görüşdə Ukrayna təmsilçisi Angelina Lısaka qalib gəlmişdir.

Ölkəmizdə qadın güləşinin lideri, Novi Sadda altıncı dəfə Avropa çempionu olmuş Mariya Stadnikdən (48 kq) sonra daha bir qadın güləşçimizin qitə çempionatında mükafatçılar sırasında yer tutması Bakıda İslam Həmrəyliyi Oyunları ərəfəsində yaxşı əlamətdir.

Beş kişi və iki qadın cüdoçu

Qazaxıstanlı tatami ustaları Azərbaycan paytaxtında İslam Həmrəyliyi Oyunlarının cüdo turnirində yeddi idmançı ilə yarışacaqlar.

Sports.kz portalının bu barədə məlumatında bildirilir ki, Qazaxıstanın kişi cüdoçuları İslamiadada beş nəfərlə təmsil olunacaq və 60, 66, 73, 100 kq-dək və 100 kq-dan yuxarı çəkilərdə ustalıqlarını nümay iş etdirəcəklər. Qadın cüdoçular isə 48 və 52 kq çəki dərəcələrində ölkələrinə medal qazandırmağa çalışacaqlar.

Oqtay BAYRAMOV,
“Xalq qəzeti”