İslam Həmrəyliyi Oyunlarında iştirak edəcək Türkiyənin 23 yaşadək futbolçulardan ibarət komandası artıq bu gün Bakıda olacaq. Türkiyə Futbol Federasiyası saytının bu barədə yaydığı xəbər, həmçinin komanda üzvlərinin siyahısı və oyunların təqvimi ilə müşayiət olunmuşdur.

İslamiada turnirində Türkiyə millisi Əlcəzair, Fələstin və Oman komandaları ilə birlikdə “B” qrupunda çıxış edəcək. Qardaş ölkə futbolçuları yarışa mayın 8-də əlcəzairli rəqiblərinə qarşı görüşlə başlayacaqlar.

“A” qrupu komandalarının da tərkibini xatırladaq: Azərbaycan, Kamerun, Səudiyyə Ərəbistanı, Mərakeş. Azərbaycan futbolçuları da ilk oyunlarını mayın 8-də keçirəcəklər. Həmin gün “Bayıl Arena”nın tribunalarına toplaşacaq azarkeşlər yığmamızın Kamerunla görüşünü izləyəcəklər.

Hər qrupdan ən yaxşı iki komanda yarımfinala çıxacaq. Yarımfinalların qalibləri isə finalda IV İslam Həmrəyliyi Oyunlarının çempionu adı uğrunda mübarizə aparmaq hüququ qazanacaqlar.

Oqtay BAYRAMOV,
“Xalq qəzeti”