12 cüdoçu, 15 atlet

Azərbaycan Milli Paralimpiya Komitəsinin rəhbərliyi IV İslam Həmrəyliyi Oyunlarında (12-22 may) ölkəmizi təmsil edəcək idmançıların  sayını açıqlamışdır.

Komitənin saytında bu barədə verilmiş məlumatda bildirilir ki, İslamiadada paralimpiyaçıların turnirlərində 27 kişi və qadın idmançımız çıxış edəcək. Onlardan 12-si cüdo, 15-i isə atletika yarışlarında mübarizə aparacaq.

Cüdoçuların turniri mayın 13-də başlanıb 15-də finişə çatacaq. Atletlərin startları isə mayın 16-20-nə təyin edilmişdir.

“Qarabağ” və “Qəbələ” finalın yarım addımlığında

Futbol üzrə Azərbaycan kuboku yarışlarının yarımfinal mərhələsinin ilk görüşlərindən sonra “Qarabağ” və “Qəbələ” finalda bir-birinə rəqib olmaq üçün özlərinə yaxşı zəmin yaratmışlar.

Hər iki komanda rəqib meydanında qələbə qazanmışdır. Ağdam futbolçuları “Neftçi”ni 2:0 hesabı ilə məğlubiyyətə uğratmışlar, Qəbələ klubunun da “İnter” üzərində qələbəsi iki top üstünlüklə ifadə olunmuşdur – 3:1.

Kubok turnirinin finalçıları aprelin 5-də keçiriləcək cavab görüşlərindən sonra qəti məlum olacaq. Təbii ki, finalın artıq yarım addımlığında olan “Qarabağ” və “Qəbələ” bu oyunlara daha yaxşı əhval-ruhiyyə ilə hazırlaşacaqlar. Maraqlıdır ki, finişə yaxınlaşmaqda olan Topaz Premyer Liqasında da baş rolları məhz bu iki komanda oynayır.

Qüvvələrə baxış

Avropa çempionatının əsas seçmə mərhələsinə hazırlığı davam etdirən Azərbaycanın futzal üzrə yığma komandası bu məsul yarış ərəfəsində yoldaşlıq görüşlərində qüvvəsini sınayır.

Futzal ustalarımızın bu günlərdə Bakı İdman Sarayında Moldova komandasına qarşı keçirdikləri iki oyun düşünmək olar ki, məşqçilərə yetirmələrinin imkanlarını yoxlamaq baxımından faydalı olmuşdur. Azərbaycan komandası bu görüşlərdə müvafiq surətdə 6:1 və 3:2 hesabı ilə qələbə qazanmışdır.

Oqtay BAYRAMOV,
“Xalq qəzeti”