Nicat Abbasov Azərbaycan çempionudur

Kişilər arasında şahmat üzrə növbəti Azərbaycan çempionatı qrossmeyster Nicat Abbasovun qələbəsi ilə başa çatmışdır. Sonuncu turda qara fiqurlarla Orxan Abdulova qalib gələn ölkə çempionu turnirdə bir dəfə də uduzmayaraq 6 qələbə və 3 heç-heçə sayəsində 7,5 xal toplamış və qızıl medal qazanmışdır.

Gümüş mükafata çempiondan yarım xal geri qalan beynəlxalq usta Misrəddin İsgəndərov sahib olmuşdur. O da finişdə Altay Eynullayevi qaralarla məğlubiyyətə uğratmışdır. Üçüncü yeri 6 xalla qrossmeyster Vüqar Rəsulov tutmuşdur.

İsveçrə sistemi üzrə keçirilib doqquz turdan ibarət olan yarışda mükafatlar uğrunda 24 şahmatçı mübarizə aparmışdır.

Çempionlar Liqası  yarımfinalın astanasında

UEFA Çempionlar Liqası turnirinin səkkizdəbir final mərhələsinə yekun vurulmuşdur. Dörddəbir finalda fəxri mükafat uğrunda mübarizəni İspaniyanın “Barselona”, “Real”, “Atletiko”, Almaniyanın “Bavariya”, “Borussiya” (Dortmund), İtaliyanın “Yuventus”, İngiltərənin “Lester” və Fransanın “Monako” komandaları davam etdirəcəklər.

Yarımfinalın astanasında qarşılaşacaq  rəqiblər bu gün İsveçrənin Nyön şəhərində keçiriləcək püşkatma mərasimində müəyyənləşəcək. Dörddəbir final mərhələsinin ilk matçları aprelin 11-12-də oynanılacaq, cavab görüşləri isə bundan bir həftə sonra keçiriləcəkdir.

Oqtay BAYRAMOV,
“Xalq qəzeti”