40-dan çox ölkənin cüdoçuları

Heydər Əliyev adına İdman Sarayında keçirilən və xalqımızın ümummilli liderinin xatirəsinə həsr edilən “Böyük dəbilqə” turniri öz bayrağı altına 40-dan çox ölkənin cüdoçularını toplamışdır.

Turnirin birinci günü keçirilən görüşlərin yekununda azərbaycanlı tatami ustalarına bir bürünc medal təqdim olunmuşdur. Orxan Səfərov 60 kq çəki dərəcəsində uğurla çıxış edərək fəxri kürsünün üçüncü pilləsinə yüksəlməklə öz mükafatlar kolleksiyasına daha bir medal əlavə etmişdir.

Üç gün üçün nəzərdə tutulmuş “Böyük dəbilqə” turnirinin açılış mərasiminə cəmi iki ay qalan IV İslam Həmrəyliyi Oyunları ərəfəsində keçirilməsini həm də İslamiada qarşısında qüvvələrə ciddi baxış hesab etmək olar.

“Azərreyl”in əzmkar  qələbə sevinci

Qadın voleybol komandaları arasında Azərbaycan Superliqasında keçirilən növbəti oyunlarda “Azərreyl” pərəstişkarlarına əzmkar qələbə sevinci yaşatmışdır.

Famil Ağayevin yetirmələri çempionluq mübarizəsində əsas rəqibləri “Telekom” voleybolçuları ilə görüşün ilk iki hissəsində uduzmalarına baxmayaraq, ruhdan düşməmiş və ardıcıl üç hissədə qalib gələrək gərgin mübarizənin taleyini öz xeyirlərinə həll etmişlər. Həmin gün digər matçda isə “Azəryol” klubu “Lokomotiv” üzərində  3:0 hesabı ilə qələbə qazanmışdır.

Hazırda turnir cədvəlinə 35 xala malik “Azərreyl” başçılıq edir. İkinci mövqedə olan “Telekom” liderdən bir xal geri qalır.

Şahmatçıların Azərbaycan çempionatında

Kişilər arasında şahmat üzrə Azərbaycan çempionatının ilk dörd turunda ən yaxşı nəticəni Vüqar Rəsulov, Misrəddin İsgəndərov, Nicat Abbasov və Əhməd Əhmədzadə göstərmişlər. Onlar hərəyə 3 xal toplamışlar.

Liderlər 2,5 xalla beşinci-onuncu yerləri bölüşdürən ən yaxın izləyicilərindən yarım xal irəli çıxmışlar.

Doqquz turdan ibarət çempionatda dünən keçirilən beşinci turun görüşləri ilə turnir məsafəsinin birinci yarısı arxada qalmışdır.

Oqtay BAYRAMOV,
 “Xalq qəzeti”