Üçüncü dövrənin finişində

“Sumqayıt” – “Qarabağ” və “İnter” – “Qəbələ” görüşləri ilə bu gün Topaz Premyer Liqasında 21-ci tura start veriləcəkdir. Turun daha iki oyunu sabah keçiriləcəkdir: “Kəpəz” – AZAL, “Neftçi” – “Zirə”.

Bu görüşlərlə milli çempionatımızın üçüncü dövrəsinə də yekun vurulacaq və turnir həlledici mərhələyə qədəm qoyacaq.

Hazırda cədvələ başçılıq edən “Qəbələ”nin 43, çempionluq mübarizəsində onun əsas rəqibi “Qarabağ”ın 42 xalı vardır. Üçüncü yeri ötən turda xal ehtiyatını 36-ya çatdırıb liderlərə bir qədər də  yaxınlaşan “İnter” tutur.

Qrossmeysterin gümüş mükafat sevinci

Azərbaycan şahmatçısı Rauf Məmmədov Moskvanın “Kosmos” mehmanxanasında keçirilmiş “Region” Şirkətlər Qrupunun kuboku uğrunda blits üzrə beynəlxalq turnirin gümüş mükafatçısı olmuşdur.

Təşkilatçıların 20 min avro məbləğində mükafat fondu təsis etdikləri və 200-ə qədər şahmatçının mübarizə apardığı yarışda Məmmədov yalnız Ukrayna təmsilçisi Anton Korobovdan geri qalmışdır. Baş mükafatın sahibi 18 mümkün xaldan 15,5 xal toplamış, Azərbaycan şahmatçısı isə finişə 13,5 xalla çatmışdır.

Üçüncü yeri 13 xalla Daniil Dubov (Rusiya) tutmuşdur.

Oqtay BAYRAMOV,
“Xalq qəzeti”