Azərbaycan şahmatçısı Şəhriyar Məmmədyarov Birləşmiş Ərəb Əmirliklərinin Şərca şəhərində FİDE-nin “Qran-pri” yarışları seriyasından birinci mərhələni yaxşı əhval-ruhiyyə ilə başa vurmuşdur.

Qrossmeysterimiz 18 rəqibin iştirak etdiyi yarışda 9 mümkün xaldan 5,5 xal toplayaraq onunla eyni nəticə göstərən rusiyalı Aleksandr Qrişuk və fransız Maksim Vaşye-Laqrav ilə birinci-üçüncü yerləri bölüşdürmüşdür. Məmmədyarov turnir cədvəlində yalnız əlavə göstəricilərə görə bu rəqiblərdən geri qalmışdır.

Birinci mərhələnin hər üç qalibi “Qran-pri”  yarışlarının ümumi hesabına 140 bal qazanmışdır. Əsasnaməyə görə,  FİDE “Qran-pri”sinin hər turnirində mükafatlar və zaçot balları eyni miqdarda xal toplayan iştirakçılar arasında yarı bölünür.

Ş.Məmmədyarov Şərca turnirində doqquz görüşdən üçündə ingilis Maykl Adams, Yevgeni Tomaşevski (Rusiya) və qadınlar arasında dünya çempionu hindistanlı Hou İfan üzərində qələbə qazanmış, Fransisko Valyexo (İspaniya), Vaşye-Laqrav, Hikaru Nakamura (ABŞ),  Dmitri Yakovenko və Yan Nepomnyaşi (hər ikisi Rusiya)  ilə heç-heçə oynamış və yalnız Qrişuka uduzmuşdur.

Beləliklə, Azərbaycan şahmatının lideri Məmmədyarov 2017-ci ildə FİDE-nin dörd mərhələdən ibarət “Qran-pri” yarışları seriyasına inamla başlamışdır. Qarşıda onu daha iki turnir gözləyir. İkinci mərhələ görüşləri mayın 11-22-də Moskvada keçiriləcəkdir.

Onu da qeyd edək ki,  Məmmədyarov “Qran-pri” turnirində uğurlu çıxışı sayəsində FİDE-nin yenicə açıqladığı və martın 1-nə olan vəziyyəti əks etdirən reytinq cədvəlində bir pillə irəliləyərək 2772 xalla 10-cu mövqeyə yüksəlmişdir. Şəhriyar rapid üzrə reytinq cədvəlində isə norveçli Maqnus Karlsen (2896) və  ukraynalı Vasili İvançukdan (2827) sonra 2825 xalla üçüncü mövqedədir.

Oqtay BAYRAMOV,
“Xalq qəzeti”