Moskvanın “Kosmos” mehmanxanasında “Aeroflot Open-2017” beynəlxalq şahmat festivalına start verilmişdir.

Çoxdan ənənəyə çevrilib artıq 15-ci dəfə təşkil edilən festival üç turniri özündə birləşdirir və onun iştirakçıları arasında Azərbaycan şahmat məktəbinin yetirmələri də vardır.

Ən güclülərin çıxış etdikləri “A” qrupunda 96 rəqib, o cümlədən 77 qrossmeyster yarışır. Milli komandamızın üzvü Rauf Məmmədov reytinqə görə onların siyahısında yeddincidir (2688). Çin şahmatçısı Yu Yanginin (2738) başçılıq etdiyi siyahıda ikinci-üçüncü yerlərdə rusiyalı qrossmeysterlər Nikita Vityuqov (2724) və Ernesto İnarkiyevdir (2723).

Martın 1-də başa çatacaq turnir İsveçrə sistemi üzrə keçirilir və doqquz turdan ibarətdir. 

“A” turnirinin qalibi iyulun 13-dən 24-dək Almaniyanın Dortmund şəhərində keçiriləcək superturnirdə çıxış etmək imkanı qazanacaq.

Azərbaycanın daha bir şahmatçısı Nərmin Xələfova isə “B” turnirində mübarizə aparır. Bu qrupda 109 rəqib yarışır, onlardan 19-u qrossmeysterdir.

Oqtay BAYRAMOV,
“Xalq qəzeti”