Azərbaycanlı qrossmeyster Şəhriyar Məmmədyarov Birləşmiş Ərəb Əmirliklərinin Şarca şəhərində keçirilən FİDE-nin “Qran-pri” turnirinin  üçüncü turunda yarışın lideri fransalı Maksim Vaşye-Laqrav ilə görüşmüşdür. Təmsilçimizin qara fiqurlarla oynadığı  görüş 51-ci gedişdə heç-heçə nəticələnmişdir.

Üç turdan sonra turnir cədvəlinin ən yüksək pilləsində olan Vaşye-Laqravın 2,5 xalı vardır. Onun ən yaxın izləyiciləri, ikinci-dördüncü yerləri bölüşdürən Məmmədyarov, ingiltərəli Maykl Adams və ABŞ təmsilçisi Hikaru Nakamura hərəyə 2 xal toplamışlar.

Dünən keçirilən dördüncü turda Azərbaycan şahmatçısı Adams ilə görüşmüşdür. On səkkiz rəqibin mübarizə apardığı bu yarış İsveçrə sistemi üzrə keçirilir və doqquz turdan ibarətdir.

Oqtay BAYRAMOV, 
“ Xalq qəzeti”