Avropa Voleybol Konfederasiyası qadın komandaları arasında Çempionlar Liqası yarışlarında “Dördlər finalı”nın keçiriləcəyi şəhərin adını açıqlayıb. Həlledici görüşlər aprelin 22-23-də İtaliyanın Trevizo şəhərində təşkil olunacaq.

Bu şəhərin “Konelyano” komandası Çempionlar Liqası turnirinin qrup mərhələsində Azərbaycanın “Telekom” klubunun rəqibidir. Əgər ilkin yarışların finişinə iki tur qalmış “Telekom” növbəti mərhələdə mübarizəni davam etdirmək hüququnu itiribsə, digər qrupda çıxış edən və hazırda ikinci pillədə olan “Azərreyl” pley-off görüşlərinə vəsiqə qazanmaq üçün yaxşı imkana malikdir. Komandamız növbəti mərhələyə çıxıb burada da uğurlu nəticələrə nail olsa, “Dördlər finalı”na vəsiqə qazanıb apreldə Trevizo şəhərində fəxri mükafat uğrunda yarışların həlledici oyunlarının iştirakçısı ola bilər.

Xatırladaq ki, Azərbaycan paytaxtı voleybolçuları qrup mərhələsinin son iki görüşündən birində “Fənərbaxça”nı (Türkiyə) qəbul edəcək, digərində isə səfərdə “Tauron” (Polşa) klubunun qonağı olacaqlar.

Oqtay BAYRAMOV,
“Xalq qəzeti”