Bu gün Unibank Premyer Liqasında 2010-cu il təqviminin son görüşləri keçiriləcəkdir. İlin vida turunda "Xəzər-Lənkəran" - "Qarabağ" və "Qəbələ" - "Bakı" qarşılaşmaları xüsusilə böyük maraq doğurur. Əgər bu görüşlərdə gələcəyi üçün o qədər də narahat olmayan Lənkəran klubu meydana vahid lider kimi çıxacaqsa, qalan üç komandanın 3 xala ehtiyacı daha çoxdur.
On doqquzuncu turda azarkeşlər həmçinin "Neftçi" - "Turan", "İnter" - "Gəncə", "Muğan" - AZAL və "Simurq" - MOİK görüşlərinin şahidi olacaqlar.
Xatırladaq ki, bu tur ərəfəsində baharda çempionatın final mərhələsində medallar uğrunda mübarizə aparmaq hüququ verən ilk altı yeri "Xəzər-Lənkəran" (40 xal), "Neftçi" (38), AZAL (34), "İnter" (31), "Qəbələ" və "Qarabağ" (hərəsinin 30 xalı var) tuturlar. Yeddinci pillədə olan "Bakı" isə 25 xal toplamışdır.{nl}