UEFA Çempionlar Liqası turnirinin səkkizdəbir final mərhələsinin birinci raundunun növbəti iki oyununda hakimlər üst-üstə 10 qol qeydə almışlar. Bu görüşlərdə meydan sahibləri rolunda çıxış edən klublar fərqlənmişlər.

Almaniyanın “Bavariya” komandası “Arsenal”a (İngiltərə), demək olar, heç bir ümid yeri qoymamışdır. Münxenlilərin dörd top üstünlüklə qələbəsi (5:1) onları dörddəbir finala çox yaxınlaşdırmışdır.

Həmin axşam Madridin “Santyaqo Bernabeu“ stadionunda da azarkeşlər darıxmalı olmamışlar. “Real” İtaliyanın “Napoli” komandasının bir qoluna üç topla cavab vermişdir—3:1.

Hər iki cütdə cavab görüşləri martın 7-də  oynanılacaq.

Liqanın səkkizdəbir finalının daha dörd oyunu gələn həftə keçiriləcək. Fevralın 21-də “Mançester Siti” (İngiltərə) “Monako”nu (Fransa), “Bayer” (Almaniya) “Atletiko”nu (İspaniya), bundan bir gün sonra isə “Sevilya” (İspaniya) “Lester”i (İngiltərə) və “Portu” (Portuqaliya) “Yuventus”u (İtaliya) qəbul edəcəklər.

Oqtay BAYRAMOV,
“Xalq qəzeti”