Liderlərin inamlı qələbələri

Azərbaycanın qadın voleybol komandaları arasında Superliqa turnirinin növbəti görüşlərində tamaşaçılar liderlərin inamlı qələbələrinin şahidi olmuşlar. “Telekom” voleybolçuları “Lokomotiv”i, “Azərreyl” isə “Azəryol”u 3:0 hesabı ilə məğlubiyyətə uğratmışlar.

Hazırda turnir cədvəlinə başçılıq edən “Telekom”un 11 oyundan sonra 29 xalı vardır, “Azərreyl” doqquz görüşdə 20 xal qazanmışdır. Üçüncü yeri 16 xala malik “Azəryol” tutur.

Finişin üç addımlığında

Qadın şahmatçıların Azərbaycan çempionatı artıq finişin astanasındadır. Doqquz turdan ibarət yarışın altı raundundan sonra turnir cədvəlinə Zeynəb Məmmədyarova, Ülviyyə Fətəliyeva və Günay Məmmədzadə üçlüyü başçılıq edir. Liderlər hərəyə 4,5 xal toplamışlar.

Cədvəldə onların ən yaxın izləyiciləri Xəyalə Abdulla, Nərmin Xələfova və Nərmin Məmmədovanın hesabında 4 xal vardır.

İyirmi iştirakçının mübarizə apardığı çempionatda dünən yeddinci turun görüşləri keçirilmişdir.

Startda Rusiyaya qarşı

Bu gün İran İslam Respublikasının Kirmanşah şəhərində sərbəst güləş üzrə Dünya Kuboku yarışına start veriləcəkdir. Artıq xəbər verdiyimiz kimi, səkkiz komandanın iştirakı ilə keçirilən bu turnirdə Azərbaycan komandası püşk nəticəsində ilkin mərhələdə Rusiya, ABŞ və Gürcüstan yığmaları ilə bir qrupda çıxış edəcək. Digər qrupa isə İran, Türkiyə, Hindistan və Monqolustan güləşçiləri daxildirlər.

Komandamız qrup mərhələsinə bu gün Rusiya təmsilçilərinə qarşı görüşlə başlayacaq, sonra Gürcüstan və ABŞ idmançıları ilə qarşılaşacaq. Medallar uğrunda həlledici görüşlər sabah keçiriləcəkdir.

PSJ dörddəbir finalda?

UEFA Çempionlar Liqası turnirinin səkkizdəbir final mərhələsinin ilk iki görüşündən birinin nəticəsi çox gözlənilməz olmuşdur. Fransa paytaxtının “Park de Prens” stadionunda Parisin “Pari Sen-Jermen” klubu İspaniyanın “Barselona” komandasını dörd cavabsız qolla məğlubiyyətə uğradaraq (4:0) dörddəbir finala aparan yolda özünə möhkəm zəmin yaratmışdır. Amma hətta belə böyük üstünlüyün iki oyunun yekununda fransızlara kifayət edib-etməyəcəyi cavab görüşündən sonra qəti məlum olacaq.

Digər oyunda da qələbəni meydan sahibləri bayram etmişlər: “Benfika” (Portuqaliya) Lissabonda Dortmundun (Almaniya) “Borussiya” komandasına qalib gəlmişdir – 1:0.

Barselona və Dortmundda cavab görüşləri martın 8-də keçiriləcəkdir.

Oqtay BAYRAMOV,
“Xalq qəzeti”