İki turdan sonra iki lider

Bakıda keçirilən qadınlar arasında şahmat üzrə növbəti Azərbaycan çempionatının ilk iki turunda ən yaxşı nəticəni Ülviyyə Fətəliyeva və Günay Məmmədzadə göstərmişlər. Onlar start turlarında rəqiblərinə qalib gəlib, hərəyə 2 xal toplamışlar.

Çempionatın medalları uğrunda iyirmi şahmatçı mübarizə aparır. Yarışın ən yüksək reytinqə malik iştirakçısı Gülnar Məmmədovadır (2401). O, ilk iki turda 1,5 xal qazanmış və liderlərdən yarım xal geri qalır.

Turnir İsveçrə sistemi üzrə keçirilir və 9 turdan ibarətdir. Sonuncu turun görüşləri fevralın 17-də oynanılacaq.

Tatami ustalarımız Parisdə

Dünən Fransa paytaxtında cüdo üzrə "Böyük dəbilqə" turnirinə start verilmişdir. İdmanın bu növündə ən mötəbər yarışlardan biri hesab edilən Paris sınaqlarında 60-dan çox ölkənin təmsilçiləri mübarizə aparırlar.

Azərbaycan idmançıları da Rio-de-Janeyro Olimpiadasının gümüş mükafatçıları Rüstəm Orucov (73 kq) və Elmar Qasımov (100 kq) başda olmaqla turnirə geniş heyətlə yola düşmüşlər. Cüdoçularımızdan birinci olaraq mübarizəyə Orxan Səfərov (60 kq), Nicat Şıxəlizadə (66 kq), Rüstəm Orucov və onun kimi 73 kq çəki dərəcəsində çıxış edən Hidayət Heydərov qoşulmuşlar. Bu çəkilərdə medallar uğrunda həlledici görüşlər dünən axşam keçirilmişdir.

Fevralın 23-də və 28-də

Qadın voleybol komandaları arasında Çempionlar Liqası turnirindəki iki təmsilçimizdən biri "Azərreyl" qrup mərhələsinin dördüncü turunda Fransanın "Senr-Rafael" klubu üzərində asan qələbədən (3:0 ) sonra pley-off görüşlərinə vəsiqə qazanmaq məqsədinə çox yaxınlaşmışdır.

Hazırda qrupumuzun turnir cədvəlinə başçılıq edən Türkiyənin "Fənərbaxça" komandasının 12 xalı vardır. İkinci pillədə irəliləyən "Azərreyl" 9, "Tauron"(Polşa) isə 3  xal toplamışlar, fransızlar hələ xal qazana bilməmişlər.

Bəs Azərbaycan voleybolçuları qrupda son iki oyunu nə vaxt keçirəcəklər? Voleybol pərəstişkarlarımıza xatırladaq ki, bu görüşlərdən birincisi fevralın 23-də Bakıda "Fənərbaxça" ilə olacaq, Polşada "Tauron"la oyun isə fevralın 28-nə  təyin edilmişdir.

 Oqtay BAYRAMOV,  
“Xalq qəzeti”