Liderlər heç-heçə ilə kifayətləndilər

Topaz Premyer Liqasının liderləri “Qarabağ” və “Qəbələ” qış fasiləsindən sonra üçüncü dövrədə keçirdikləri ilk oyunlarda heç-heçə ilə kifayətlənməli olmuşlar. Ağdam klubu çempionatın birinci yarısı ilə müqayisədə bahar  futbolunun startında xoş təsir bağışlayan “Neftçi”nin, Qəbələ klubu isə “Sumqayıt”ın  müqavimətini qıra bilməmişlər. Hər iki oyunda hakimlər 1:1 hesahbı qeydə almışlar.

Bundan istifadə edən “İnter” futbolçuları “Kəpəz” üzərində böyük hesabla (4:1) qələbə  sayəsində liderlərlə öz aralarındakı fərqi bir qədər azaltmışlar. Turun daha bir oyununda isə “Zirə”  AZAL-ı  məğlubiyyətə uğratmışdır—2:1.

Bu turdan sonra 33 xalla turnir cədvəlinə başçılıq edən “Qarabağ” əvvəlkitək “Qəbələ”dən (32) bir xal irəlidədir, üçüncü mövqedə olan “İnter”in 28 xalı var.

Çempionatda növbəti, 16-cı turun görüşləri fevralın 3-də (AZAL—Qarabağ”, “Neftçi”—“Qəbələ”) və 4-də (“Kəpəz”—“Zirə”, “Sumqayıt”—“İnter”) keçiriləcəkdir.

Afrika Millətlər Kuboku uğrunda

Qabonda davam edən futbol üzrə Afrika Millətlər Kuboku turnirində yarımfinalçılar müəyyənləşmişdir. Finalın astanasında Burkina-Faso komandası Misir yığması, Kamerun isə Qana ilə qarşılaşacaq.

Yarımfinal oyunları fevralın 1-2-də keçiriləcəkdir. Onların qalibləri fevralın 5-də finalda görüşəcəklər.

Ardıcıl üç qələbə

İran İslam Respublikasında keçirilən “Fajr Sabalan Kup 2017” beynəlxalq şahmat turnirinin ilk  üç turunda ən yaxşı nəticəni azərbaycanlı qrossmeyster Azər Mirzəyev və yarış sahiblərinin nümayəndəsi Ehsan Qaem Maqami göstərmişlər.

Hər iki lider 3 xal toplamışdır. Əllidən  çox iştirakçının çıxış etdiyi turnir 11 turdan ibarətdir. Dünən rəqiblər dördüncü turun görüşlərində mübarizə aparmışlar.

Oqtay BAYRAMOV,
“Xalq qəzeti”